00:00

By: v

Graphics by: Cassius Klai C. Francisco

Madalang lang kitang maisip bandang ala-una

Kumakain kasi ako no'n, lunch kasama tropa

Pag alas dos naman, balik gawain na

Susulat ng report, o babalik sa Mapúa.

Alas tres matatapos 'yung isang oras na klase

Pero mamaya pa ako uuwi, pagsabit ng gabi

Pagdating ng alas kwatro, tatambay sa tabi

Hindi pa din kita naiisip, busy din kasi.

Pababa na ang araw mga alas singko,

Siguro nag-iimpake na ng gamit ko,

Alas sais, baka andun na ako sa Recto,

Pasakay na ng tren pabalik sa Antipolo.

Kakain na ulit hapunan bandang alas syete

Tapos magpapahinga, maglalaro ng kaunti

Alas otso ng gabi, balik gawain na uli

Maya-maya'y hihiga, pipikit ng alas nuwebe.

Kaso bakit 'ganon, hindi ako makatulog

Alas diyes, bigla akong binubulabog

Ng mga alaala kung paano ako nahulog

Pero walang sumalo, nasaktan lang at nadurog.

Babangon ako ulit sa kama, mga alas onse

Susubukang libangin na lang ang sarili

O kaya'y mapapaiisip, anong nagawa kong mali?

Bakit matapos ang lahat, hindi mo ako pinili?

Pagsapit ng alas dose, tuluyan nang susuko

Tatanggapin na lang ang aking pagkabigo

Pero ganon naman ulit bukas, hindi na nahinto

Hihikbi na lang siguro't maghihintay ng patago.